NO KAYATMO TI RAG-O

Adda ti naam-ammok a naganus ken napintas a balasang a nagsapsapul iti rag-o ragsak. Awan ti dina pinadas. Naaddaan iti pirak, panakinaig kadagiti lallaki, inumen a nasanger, druga, napipintas nga arwaten, ken asawa a nangipalubos iti amin a pagayatanna. Mabalin a makuna nga isu ket naragsak. Namindua a ginandatna a pukawen ti biagna ngem napaay. Naganak a naganus a balasang ti inauna nga anakna. Adda met naaramidan ti inaudi a kabsatna, a no nataengan koma ket naibalud iti umagarup lima a tawen.

Apay a saan a naragsak? Nabiag ngamin a kas iti pagayatanna. Saan a pinaiturayan iti anyaman a linteg a namoralan ken naestilo a panakilangen. Ken awan ti nangipabigbig kenkuana a saan a naan-anay ti ragsakna. Ammo dagiti isu amin a makaam-ammo kenkuana nga agbibiag a nakaay-ay-ay.

Daytoy a babai ket maysa kadagiti rinibu a mangtuntonton iti ragsak ngem kaskasdi a dina naragpatan. Umingar a makangngeg ti linteg dagiti Cristiano a namoralan ken umsienna ti kapanunotan a naragsak ti siasinoman nga agbiag para ken Jesucristo.

Adu dagiti saan mangikankano kadagiti “Cristiano” nga assaan “aleng-aleng a relihiyoh”. Ken manguy-uyaw kadagiti, banbanag a maipapan ken Cristo. Ti talna rag-o, ragsak ken ti panakapnek ket saan nga isu ti pudno a kapanunotanda maipanggep ti kaipapanan ti pudno a Cristiano.

Kadatayo a nakaamirisen ti pudno a kaipapanan ti BIAG, maawatantayo ti kunana iti Biblia, “Kadakuada ti dios a nailubongan binulsekna dagiti is-isip dagiti saan a namati, tapno di agraniag kadakuada ti lawag ti evangelio ti dayag ni Cristo, isu a ladawan ti Dios….” (2 Corinto 4:4; basaenyo ti Juan 12:40).
Daytoy ket mapaspasamak iti amin nga edad. Mabalin a sawen tayo iti nebated nga iti ad-adda a panangtuntontayo iti rag-o ken ragsak, ad-adda met nga itarayannatayo.

Ngem no mapaspasnek ti maysa a tao a manggun-od kadagiti banbanag a nadiosan, lipatenna ti bukodna a bagi ket tumulong iti padana a tao, ad-adda pay a rag-o ragsak ti sagrapenna. Kas kunana iti Mateo 6:33, “Ngem birukenyo nga umunati Dios ken ti kinalintegna, ket isuamin dagitoy a banbanag maiayondanto kadakayo.” Numanpay daytoy ti mainumo nga aramiden, awan ti mayat a mangaramid.

Ita agsalodsodak man, pudno kadi a naragsakka? Mapnekka kadin iti agdama a biagmo? Nasapulam kadin ti kinapudno babaen ti druga? seks? inumen a naparagsit a musika? Ar-aramidem kadi ti bukodmo a pagayatan? Wenno padpadasem kadi a tuntunen ti kaipapanan ti maysa a “banag?”

No napadasamon ti amin ket napaayka, padasem man ni Jesucristo. Ipalubosmo man a sagidennaka ti makakoryente a PANNAKABALINNA ket agbalbaliwka a maminpinsan. “Ti talna ibatik kadacayo, ti talnak itdek kadakayo: saan a kas ti panangited ti lubong ti panagitedko kadakayo. Saan koma nga agpulkok ti pusoyo ken di agbuteng,” (Juan 14:27). “Dagitoy insaok idi kadakayo tapno adda koma talnayo kaniak; ditoy lubong addanto rigatyo: ngem manginanamakayo, siak pinarmekko ti lubong,” (Juan 16:33). “Awan ti talna iti nadangkes,” (Isaias 48:22). “Isu nga uray no dikay makita, ayatenyo; ket uray no ita ket dikay makita, patienyo ket agrag-ocayo iti nayebkas a rag-o ken napno iti dayag,” (1 Pedro 1:8).

Kasano ti isusuknalmo ken Jesucristo? Kasano ti panangragpatmo iti rag-o, talna ken ragsak kenkuana? No pudno a mamatika nga isu ti makaisalakan ken mangted iti talna mapapigsake iti Dagiti Aramid 2:38 a kunana: “Ket ni Pedro kinunana kadakuada: ‘Agbabawikayo, ken mabautizaran ti tunggal maysa kadakayo iti nagan ni Jesu-Cristo a maipaay iti pannakaikkat dagiti basbasolyo; ket awatenyonto ti parangkap ti Espiritu Santo.”

Mariknam kadi a saanka a namati? “Ngem ti Dios ipatalgedna ti ayatna kadakayo, agsipud ta idinto a managbasoltayo, pay laeng , ni Cristo natay gapu kadatayo,” (Roma 5:8). “Ta kasta la unay ti panagayat ti Dios iti lubong; nga intedna ti Anacna a Bugbugtong, tapno ammin a mamati kenkuana, saan a mapukaw, no di ket adda biagna nga agnanayon,” (Juan 3:16).

Anya ti mapasamak no mamati, agbabawi ken mabautizaranka iti nagan ni Apo Jesus? Awatem ti parangkap ti Espiritu Santo ken “Gapuna no ti maysa adda ken Cristo, isu baro a parsua: dagiti banag a daan napalabasdan, adtoy nagbalinda a baro,” (2 Corinto 5:17). Baro a pagayatan, baro a panirigan, talma ragsak ken pananapnek! “Ngem ti bunga ti Espiritu ayat, rag-o, talna, mabayag a panagitured, kinaanus, kinalaing, kinamanagtalek,” (Galacia 5:22).

No naumakan iti kadaanan nga aramid, padasem ti makirelasyon Kenkuana a dimo pay napadasan iti biagno! Agbalbaliwka, awatem ti PANNAKABALIN, ket maaddaanka iti sibubukel a BARO A BIAG! S. M. S.

http://www.sayadi-al-nas.com
صيادي الناس